Regine, Kabado sa Magiging Resulta ng Movie Nila ni Aga: “Nakakatakot, Dahil Nabantilawan Na!”

Abante, July 4, 2010

Regine, Kabado sa Magiging Resulta ng Movie Nila ni Aga: “Nakakatakot, Dahil Nabantilawan Na!”
ni Rey Pumaloy

Sa mga oras na ito, malamang ay nagtagpo na ulit sina Regine Velasquez at Aga Muhlach sa shooting ng pelikula nila sa Viva Films. Nu’ng huli nga naming makausap si Regine sa taping ng Diva, sinabi niya na siguradong maiilang siya sa muli nilang pagkikita ni Aga, dahil matagal nga raw kasing nahinto ang shooting nila.

Pero sey na rin ni Regine, dahil pareho naman silang kalog ni Aga, sure raw na maibabalik ulit ang kuwentuhan at tawanan sa kanila.

Pero, inamin ni Regine na kabado siya sa posibleng maging resulta ng pelikula nila ni Aga, dahil nabantilawan na raw ito.

“Definitely, natatakot din kaming lahat dahil nabantiwalan na nga.

Ang tagal na kasi. But we’re hoping hindi naman at sana yung nag-aabang eh, abangan pa rin at panoorin pa rin nila ang movie.

“At saka, ang ibinebenta kasi namin dito ay yung buong project at yung ganda ng istorya,” umaasang pahayag ni Regine.

Umaasa si Regine na hindi pababayaan ng Viva sa project nila ni Aga, lalo na at malaking pera ang involved sa movie.

Siyanga pala, ibinalita na rin ni Regine na tuloy na ang paggawa niya ng indie film na ididirek ni Dante Garcia, ang Mrs. Recto. Role ng isang inang hindi nakapag-aral ang gagampanan ni Regine at marami raw siyang pagdadaanan para lang mapag-aral niya ang kanyang anak. Excited si Regine sa project dahil first time niyang gagawa ng isang indie film.

Siyanga pala, patuloy na namamayagpag sa ratings ang Diva. Habang tumatagal ay lalo ngang gumaganda ang reviews ng mga manonood sa Diva.